المره دي البوست مختلف تمام
يمكن علشان دا اخر بوست ليا هنا في مصر
والي جاي لو ربنا اراد ليا اني اكمل هيكون في مكان تاني خالص
عايزه اوصفلكم مشهدين عشت فيهم طول عمري
وكانت ايامي بتتنقل بين المشهدين دول
مشهد في صاله الوصول في مطار القاهره الدولي وانا بستني والدي
كل الوجوه هناك بيطغي عليها شيء واحد بس
النور
النور الي باين في ملامحهم
والفرحه الي بتطل من عنيهم
وضحكه بترن طالعه من نفس صافيه
وقلب بيدق وبيرقص من كتر الفرح
وطبعا اكيد الي مر بنفس الموقف دا هيحس بمشاعر مختلفه وبطعم تاني للدنيا خلال الدقائق الي بينتظر فيها اعز الناس علي قلبه
المشهد التاني
مشهد الوداع في صاله المغادره وبرضه في مطار القاهره الدولي
من اول ما خيوط النور تعلن عن مجيء اليوم دا وكل حاجه بتتلغبط
حتي وقع الدقائق علي عقارب الساعه بيكون رتيب وممل
وانقباض في القلب ورغبه عارمه في البكاء
وبعد ايام قليله من اللحظات العسيره دي
بيعود كل شيء لوضعه
الرتيب الممل
في انتظار معاد الوصول التاني
حياه بجد صعبه
صعب انك تحس ان كل مشاعرك بتتشتت من حين الي اخر في كل اتجاه
انك تنحرم من ناس بتحبهم بفعل المكان والزمن والظروف
المشكله دلوقتي اني بتعرض انا لموقف جديد يمكن من نوعه
من اول ما اتخرجت وانا بحلم تاني بالسفر
ولما اتحقق الحلم فرحت جدا جدا علشان هلاقي نفسي من جديد واحس بذاتي الي ضاعت هنا وسط الروتين والكوسه والمحسوبيه
بس الي معملتش حسابه هو مجموعه من المشاعر الي اجتاحتني خلال اليومين الي فاتو
ادركت ويمكن لاول مره
اني هبعد عن امي واخواتي واصحابي وناس بحبها
واماكن اتعودت عليها
كل شيء في اليومين الي فاتوا دول بقي ليه طعم تاني خالص
كلامي مع امي واخواتي واصحابي بقي مختلف
وكأني بشحن نفسي بكلمهم وصوتهم علشان اتصبر علي بعدهم
حتي الاماكن الي كنت بتخنق منها والشوارع الي كنت بموت من زحمتها
بقي ليها في عيني شكل تاني
وسلم بيتنا الي كان بيقطع نفسي لغايه ما اطلعه حسيت بجد انه هيوحشني
حجات كتير اتغيرت في نظرتي للامور
وفهمت منها ان الانسان بأيده انه يشكل احساسه بالاشياء علي حسب نظرته ليها
نفس الاشياء الي كنت بكرها دلوقتي بحبها
اكيد فهمنني
انا مش عايزه اطول واكون رخمه واسبب الاكتئاب لأي حد بيقراء
بس بجد انا فهمت دلوقتي انا عايزه ليه اطلع من مصر
علشان افضل احبها زي ما انا
لو فضلت فيها هكرها واكره اليوم الي رجعتلها فيه
فالاحسن اني ابعد
علشان افضل احبك يا بلدي
يارانيا يا اختي انا لازم اذكرك هنا
اختي وحببتي وصحبتي وتوؤم روحي كمان
اوع تتخطبي وانا مش موجوده هقطع خبرك والله
بحبك انت ويارا ودينا ومينا ويامن وكل الي كانوا معايا في الكليه
ويارب نفضل اخوات علي طول
عايزه اقول لكل حد دخلي هنا ونورني بكلامه ومشاركته ليا الف كلمه شكر
لكل حد سأل عليا واهتم لامري الف كلمه شكر
لكل حد انتقدني وصححلي خطئ الف كلمه شكر
لكل شخص دخلت مدونته واستمتعت بكتابته الف كلمه شكر
من دون ذكر اسماء علشان منساش حد
بحبكم كلكم والله ويارب نفضل علي طول متواصلين مع بعض
وبعتذر لو انشغلت عن حد فيكم الفتره الي فاتت بس والله هيا ظروف السفر
انا هكون يوم الجمعه بليل في مطار الكويت ان شاء الله
ويارب تكون بدايه لحياه جديده الاقي فيها نفسي
بحبكم كلكم بجد
ربنا يخليكو ليا
لا اله الا الله
محمد رسول الله
Falling hearts Here
